آخر خبر تحاور نسرين الغريب التي تكشف تفاصيل حصرية وهذا رأيها في بنكيران وبدر هاري ومسلم وأسامة البسطاوي

آخر خبر –حاورها : انس الكروني

بعد تحقيق نسب مشاهدة عالية على اليوتوب و التي فاقت المليونين ،و تميزها بأداء مختلف ،تستقبل الجمهور بروحها المرحة و ترجمتها لبعض الأغاني الشباب بطريقتها الخاصة ، نسرين الغريب في حوار خاص مع آخر خبر،فلنتابع.

وتقول “اعجبني الحال بزااف و كون كنت كنعرف نطير كون طرت بالفرحة” 

• مرحبا بك نسرين معنا ف آخر خبر ، سؤالي الأول هو كيف جاتك فكرة إعادة صياغة الأغاني بهاد الطريقة المرحة ؟
** مرحبا ، الفكرة جات من وقت طويل ، فاش نكون بوحدي و فوقت الفراغ كنقوم بتصوير فيديو على هاد الشاكلة.
• جميل ، علاش كانت البداية ديالك مع أغنية “حك لي لي نيفي ” و ما بديتيش قبل ؟
** لا البداية كانت قبل “حك لي لي نيفي” غير كنت كنشاركهم فقط على الفيسبوك و عندي أغنية وحدة لي قديمة على القناة فاليوتوب .و في نفس الوقت فاش عاودت “حك لي لي نيفي” كانت رسالة اعتذار لأني ما قدرتش نكون معهم في تورناج لظروف خاصة.
• إحساسك نسرين فاش لقيتي الفيديو ديالك وصل ل جوج د المليون مشاهدة على اليوتوب ؟
** اعجبني الحال بزااف و كون كنت كنعرف نطير كون طرت بالفرحة .
• بغينا تعليقك على فريق Barpapappa ؟
** أعضاء من الفريق هم إخوتي أصدقائي بعجالة عائلتي الثانية دخلو بشكل جديد للمغرب لي لقى إقبال كبير من عند الصغير و الكبير رغم أن العديد من الفرق بغات تقلده لكن الأصل باين .
• نسرين واش كتفكري تبقاي فنفس هاد ستيل لي نتي فيه و لا ممكن تبدلي ؟
**كيوصلوني رسائل عديدة من عند بنات منهم كيقولو لي نبدل ستيل منهم كيقولولي ندير بودكاست و نكون أول بنت فهاد المجال و لكن الأهم عندي دابا هو نكمل فهاد الشكل لي بديت فيه و ربي يكمل بالخير.
• عطينا رأيك على اليوتوبرز المغاربة و كيفاش كيبان ليك مستقبل الويب ف المغرب ؟
** كاينين بزاف د اليوتوبرز لي واصلين بحال الصديق صدراتي ، شريف ، رمزي و كنشوف الفيديوهات ديالهم بزاف و كنتمنى ليهم التوفيق ، بالنسبة للويب كنشوف أنه في تقدم و الحمد لله.
• جديدك نسرين ؟
** قريبا غندير فيديو آخر و عندي بزاف د المفاجآت نخليكم تنتظروهم .
• أربع شخصيات بغينا رأيك فيهم  في كلمة . بنكيران ، بدر هاري ، مسلم ، أسامة البسطاوي.
** بنكيران ، ما عنديش مع السياسة و الكذوب و النفاق ، بدر هاري واعر واعر دونجي و مفخرتنا كمغاربة ، مسلم أحسن أغنية اعجبتني “لو كان الواقع لوحة ” ، البسطاوي ابن أسطورة و لابد ياخذ من والده شي حاجة . تفرجت فيه تبارك الله عليه.
• آخر كلمة تبغي تقوليها للجمهور نسرين .
** الناس لي كيبغيوني و لي مكيبغيونيش أنا كنحبهم كاملين من صميم قلبي ، و ضحكو راه الابتسامة في الوجه صدقة ، و أنا فقط بغيت نكون سبب في ابتسامتكم و شكرا .