“سيني بلاج”.. عبد الواحد مجاهد يراهن على البحر والفن لكتابة تجربة مغربية بصبغة عالمية

الرباط: يونس الركيك

في قلب الصيف، خرج الفنان عبد الواحد مجاهد بمشروع جديد سما ليه “سيني بلاج”، مشروع كيقلب المعادلة: عرض فني مفتوح، على إيقاع الموج، ولكن بروح مغربية خالصة.

مجاهد ما بغاش “سيني بلاج” يكون غير سهرة عادية. الفكرة حسب تصريحاتو هي خلق مساحة كتلاقى فيها الموسيقى مع السينما، والجمهور مع الفنان، فبلاصة مفتوحة على البحر ولكن مقفولة على القيم ديالنا.

وقال: “كنآمنو أن الفنان المغربي يقدر ينافس عالميا بلا ما يبيع الهوية ديالو. نقدر نجيبو تجارب من البرا، ولكن نلبسوها قفطان مغربي”.

المشروع مركز حتى على الشباب. الهدف ماشي غير المتعة، ولكن حتى فتح الباب قدام الأسماء الجديدة باش تطلع للواجهة وتخدم حدا محترفين، وتوصل صوتها لجمهور أوسع.

من نهار تطلق الإعلان ديال “سيني بلاج” وهو عامل ضجة. الناس شافو فيه نفس جديد فالمشهد الثقافي الصيفي، حاجة مختلفة على الحفلات التقليدية، كتجمع بين الخفة ديال الصيف وعمق ديال الثقافة.

وختم مجاهد كلامو بجملة مختصرة: “العالمية ماشي أنك تولي بحالهم.. العالمية أنهم يوليو يبغيو يشوفو كيف دايرين حنايا”