فيديو للحظة إنقاذ طفلة فلسطينية من الموت اختناقا..و هذا ما قاله الطبيب المنقذ عن تلك اللحظات العصيبة ..

“الثانية فجرا الا عشرة دقائق
كان يوم شَديد ومُرهق
ما قدرت استنى اصل البيت عشان ارتاح
نمت على احد الأسِرَّه و غفيت للحظات
بس الموت
حسيت فيه
صراخ و صياح
الموت جاي لعندي
ركضت وانا نائم
الصراخ لسا ما وعّاني
كثير افكار و خربطات و تهيئات براسي والموت بعده الي مسيطر
حسيت راسي بده يفقع
عيوني لسا ما فتحوا
ما عندي لسا القدره انه استوعب ايش الي قاعد بصير
الاب بصرخ بصوت مبحوح :
“ماتت ماتت مخنوقه..مشااان الله..مااااااتت”
الام بكاء بدون صوت
مش قادره تطلع الكلمه
الاب:
“البنت ما بتتحرك”
أنا:
“الله اكبر..يااا الله يااا الله”
حملت الطفله بلا وعي و لا ادراك
حملت جثه طفلة عمرها سنه و اربع شهور
حملتها و لهون وقف قلبي
مددتها على ايدي اليمين و وجهها لتحت و ضربتها مره وراء الثانية براحة ايدي الثانية على منتصف الظهر
لحظه و بكت الطفله
و بوقتها انا صحيت
رفعت راسي للسما
“يااا الله..الحمد الله”.
الاهل و انا دخلنا بصدمه لحظية من عظم الموقف
اجرينا مو قادرين يحملونا..قعدنا على الارض
الاب:
“شو صار بعدها عايشه..بعدها عايشه؟!”
انا:
“والله بعدها عايشه..هيها بتبكي”.
هاي اللحظات و المواقف من الحياة الي مستحل تتنتسى
لحظات بتحس فيها بعظم الروح، بتشعر و بتعيش غريزة الابوة و الامومه، بتشوف قلب الام و الاب كيف ممكن ينفطر على الفراق..موقف بتحس بكونك طبيب، الله يسرك لهيك موقف، لتعيش هيك حاله و تكون سبب لانقاذ روح بتوفيق منه.
لحظات راح تكون مصدر لزديادك ايمان بما تفعل و تحب💙

هذه الكلمات التي نشرها الطبيب “مجاهد نزال” في تدوينة له على حسابه الشخصي بمنصة فيس بوك، يصف من خلالها اللحظات الحرجة التي مر بها لحظة اقتحام أم و أب لغرفة المستعجلات حاملين طفلتهما الرضيعة،  التي كانت تختنق و غير قادرة على التنفس حتى ظنا أنها ماتت، تم توثيق هذه اللحظات عبر كاميرا مراقبة بالمستشفى، و أظهرت تفاصيل لحظات مليئة بالخوف و الهلع و التوتر و بطولة و إنسانية طبيب، انهار هو الآخر بعد عودة الصغيرة إلى الحياة و حين تأكد من تجاوزها مرحلة الخطر جلس القرفصاء قرب والدها الذي افترش الأرض على بطنه من التأثر و الأم الباكية بصمت و لم تعد تقوى حتى على الإمساك بابنتها. بطولة طبيب و عظمة أبوين و حياة إنسان تجتمع في صورة واحدة تجسد عظمة الخالق الذي جعل الحب و التضحية و الأمانة و العزيمة عناصر أساسية لأجل استمرار الإنسانية..

لحظات إنقاذ طفلة فلسطينية من الموت اختناقا